بتكلم عن تجربتي لعملية تصحيح بُعد النظر سمايل.اولاً عمليات العيون لتصحيح بُعد النظر ٣انواع حسب خبرتي أجددهم السمايل.
انا بتكلم عن سمايل اللي سويتها انشهرت من عام ٢٠١٤ . ماراح اتكلم عن شنو اهي وشلون نسويها لانه هالكلام مكتوب بالنت اذا بحثتوا .بس للعلم عملية الليزك اللي قبل السمايل تسبب جفاف بالعين نسبة ٦٥٪ لكن عملية السمايل تسبب جفاف بنسبه ٥٪ .
بتكلم عن تجربتي الشخصية اللي سويتها عند الدكتور خالد السبتي بمركز الكويت التخصصي للعيون.

يوم الاحد رحت عند عياده الدكتور فتحت ملف وسويت فحص شامل خاص لعملية سمايل وكان يشمل اكثر من فحص بالعياده . لما انتهى الفحص دخلت ع الدكتور خالد السبتي شرح لي عن العملية ومدى سهولتها وسرعتها حيث انه مده العملية ١٠ دقايق فقط . وممكن استخدام الهاتف والاجهزه الالكترونية ودخول الماء فقط بعد انتهاء ٨ ساعات بعد العملية . الدكتور خالد السبتي خوش دكتور فعلا ماشاء الله عليه كلامه حيل زين وباله طويل ماشاء الله .اجمالي المبلغ اللي دفعته لفتح الملف ولفحص عملية السمايل فقط ١٤٥دينار .
عطوني موعد ليوم الثلاثاء خيروني بين الثلاثا اللي يكون عقب الاحد على طول ولا الثلاثا الاقادم بعد اسبوع اخترت الاقرب .
الموعد كان ع الساعه١٢ الظهر لما وصلت سويت فحوصات قبل العملية . دخلت غرفة الانتظار لبسوني البالطو وكاب وتكرمون قطوا الجوتي ولبسوني نفس الكاب اللي ينحط ع الرجل . خفت حسيت بالصجية ههههههههه
لما دخلت طمني الدكتور بمدى سهوله العملية وقال لي مااخاف وغيري واجد سوها احسن بكثير . سميت باسم الله وتوكلت عليه دخلت وسوا العمليه كانت جدا سريعا ١٠دقايق او اقل . ماحسيت بألم أبدا .لما  طلعت من العملية دخلت غرفه كلمتي فيها وعطاني ارشادات منها اني ابتعد قدر الامكان عن الاضواء والاجهزه واقعد بمكان اضاءته خافته او مظلم واغمض عيني كثر مااقدر عشان ترتاح العين بس افتح عيني لما اكل ولا اصلي او تكرمون اروح الحمام فقط عطاني نظاره شمسيه خاص طبية البسها علي لمده ٨ساعات .وتكون علي النظاره مااقطها هم قال عيوني مايحوشها ماي ابدا لمده ٨ ساعات ايضا . للعلم لما سويت العمليه كانت الساعه٣ العصر قال لي اخلي النظاره علي لين بكرا احسن . عطاني قطرتين كل ٣ساعات احطهم .قالي عقب العمليه ب٨ساعات اللي راح تشوفه من٨٠ الى٨٥٪‏ فقط وكل يوم راح يتحسن النظر احسن . عطوني موعد ليوم الخميس الصبح  عقب العملية .رديت البيت قعدت بغرفه مظلمة عشان اريح العين وظليت مغمض عيوني كثر مااقدر .
يوم الخميس الصبح رحت للمراجعة سوا لي فحص وطمني قال انه انتي الحين ممكن الاشياء البعيده ماتشوفها بس راح يتحسن النظر كل يوم بزياده ، سألت الدكتور اني الاحظ فرق بالعينين من ناحية النظر قالي هذا شي عادي جدا لانه النظر قاعد يتحسن بالنهاية ماراح يختلفون العينين كلهم بصيرون نفس الشي ممتازين . طبعا باليوم اللي راجعته عطاني قطره مرطب للعين نوع خاص قالي ما اغيره لمده شهر كامل استخدمه يوميا ٦مرات باليوم بالاضافه اني استمر على القطرتين ٤مرات باليوم . والمراجعة الثانيه بعد شهر اهم يدقون علي . للعلم مبلغ عمليه السمايل عند عياده الدكتوره خالد السبتي بمركز الكويت التخصصي للعيون ١٤٠٠دينار غير شامل سعر فتح ملف وسعر الفحوصات الاولى اللي اهي ١٤٥ دينار كويتي . ادري المبلغ كبير ويعتبر السعر غالي بس لازم نتخلص من النظاره العمليه سهله وبسيطه ومريحة جدا جدا . للعلم ايضا عمليه السمايل متوفره فقط عند الدكتور خالد السبتي فقط بالكويت
عنوان العيادة : الشعب البحري - قطعة 8 على شارع الخليج العربي بجانب مطعم شلاويط مركز الكويت التخصصي للعيون - الدور السابع
اوقات العمل:
 يوميا باسثناء الجمعة والسبت صباحا من الساعه ٩ -١٢ مساء من5-8رقم العيادة : 22211000